Atuarfimmi pisortaanertut, Narsap Atuarfia, Narsaq immikkut atugassarititat tunngavigalugit
ALLAGARSIUTEQQITAQ:
Atuarfiup pisortaatut atorfik inuttassarsiorneqarpoq novembarip ulluisa aallaqqaataat 2024 inuttalerneqartussanngorlugu isumaqatigiissuteqarnikkulluunniit.
Narsap Atuarfiani sulisut, atuartut kiisalu minnerunngitsumik angajoqqaat kissaatigaat pisortartaarnissaq anguniagaqartumik takorluuisinnaassuseqartumillu, pisortaqatini sulisullu allat suleqatigalugit atuarfiup qaffanneqarnissaanik qulakkeerinnissinnaasoq atuartitsinikkullu angusatigullu siuarsaasinnaassusilimmik.
Narsap atuarfiani paasissutissat:
- 200-t missaannik atuartoqarpoq
- 26 ilinniartitsisut normeringeqarpoq
- Immikkoortunut pingasunut immikkoortiteqqavoq
- Ilinniartisisut suleqatigiillaqqissuupput nutaanillu suleqatinik tapersersuillaqqissuullutik
- immikkoortut tamarmik aulaqarput
- Aulaqarportaaq ilinniartitsisut atuartullu tamarmik katersuuffigisinnaasaannik
- isiginnaartitsisarfeqarlunilu nipilersortarfeqarpoq
- immikkoortoq 2 aamma 3-mi ilinniartitsisut sulliveqarput, pædagogisk værkstedip avataatigut
- Init atuartitsiviusut tamarmik smartboardeqarput ”Prowise”-nik taaguutilinnik
- atuartut tamarmik iPadeqarput atuartitsinermi atortartunik
- ilinniartitsisut lærerintra atorluarpaat, forældreintra atorneqarsinnaalernikuuvoq
- atuarfik kamippaqarfioqqusaanngilaq
- Atuarfik ukiut pingasut matuma siorna nutarterpoq KN-imilu ullutsinnut naleqqunnerpaalluni
- ukiut pingasut nutarterneraniit qaangiukkaluartut nutaatut suli isikkoqarpoq atuisut tamarmik paarilluaqimmassuk
- Atuarfik atuartut angusaannik qaffassaanermut iliuuseqarpoq
- atuartut lektionini tamani annaasaqaratik atuartinneqarnissaat aaqqissuulluakkamik anguniarneqarpoq
Kissaatigaarput pisortaq:
- Aqutsinissamik, ilinniartitsisunik siunnersuinissamik ilitsersuinissamillu, kiisalu nakkutilliinissamik piginnaasaqartoq
- Aningaasanik ingerlatsinermik paasisimasaqartoq missingersuutinillu angisuunik aqutsisinnaasoq
- Siunertanik anguniagaqarnermi ingerlatitseqqissinnaasoq, suleqatigiinnermi qummut ammullu ataqqinnilluni aaqqissugaanerup iluani suliniuteqarsinnaasoq.
Pingaartipparput:
- Suleqatiginnillaqqissuunissat, pisortarisannut suleqatinullu.
- Suleqatiginnilluarsinnaanerit, ilinniartitsisunik, sulisunut allanut pisortarisannullu.
- Pisortatut inissisimanissat paasilluassagit
- Allakkatigut oqaloqatigiinnikkullu pitsaasumik attaveqaqateqarsinnaanissat
- Ulluinnarni sulininni sakkortuunik assoruunnartunik piumasaqarfigineqarsinnaanissat
- Sulisitsisunnut ilumoortuunissat
- Kalaallisut qallunaatullu oqalussinnaaguit qujanassaqaaq, pingaarnerpaavorli aqutsilluarsinnaanissat.
Meeqqanik pinerliisimannginnermut uppernarsaammik:
Atorfik una meeqqanik pinerliisimannginnermut uppernarsaammik pissarsiniartussaatitaaneq pillugu inatsimmut ilaatinneqarpoq. Inatsit naapertorlugu kommuni meeqqanut pinerliisimannginnermut uppernarsaatip tigunerata kingorna aatsaat atorfinitsitsisinnaavoq.
Kommunip nalilersuinerani atorfimmi tassani kina ivertinneqassanersoq meeqqanik pinerliisimannginnermik uppernarsaat aalajangeeqataasussaavoq.
Isumaqaruit qulaani piumasaqaatit naammassisinnaallugit, qinnuteqassaatit.
Atuarfiup pisortaata qullersarissavaa Kommune Kujallermi atuarfeqarnermut meeqqeriveqarnermullu ingerlatsivimmi pisortaq, Qaqortumi allaffeqarfiani inissisimasoq.
Atorfinitsitaanermi atugassat:
Atorfinitsitaanermi Isumaqatigiiissut pingaarneq 28.10. 1998-imeersoq aamma Naalakkersuisut IMAK-illu akornanni isumaqatigiissut 27. august 2014 –imeersoq kiisalu immikkut atugassarititat tunngavigalugit isumaqatigiissut 16. februar 2007 tunngavigalugit atorfinitsitsisoqassaaq.
Atorfinittoq ilaqutaalu qaamatit aqqaneq-marluk qaangiukkaagata akiliunneqarlutik sulinngiffeqarnermut atatillugu angalasinnaatitaapput, piumasaqaatit atuuttut naapertorlugit. Tamatuma saniatigut atorfimmi soraarnerup kingorna atorfinitsitsisarnerup piumasaqaataa 1991-meersoq malillugu 18.000 kroninik konto-mut matoqqasumut ikisisoqassaaq. Soraarnerup kingorna aningaasat tunniunneqassapput.
Atorfinitsinneqarnissaq pissaaq Naalakkersuisut IMAK-illu isumaqatigiissutaat, meeqqat atuarfiini nunatsinni il.il. isumaqatigiissut malillugu, akissarsiat inissisimaffianni 36-anni immikkut tapilik ukiumut kr. 60.940,00.
Inissaqartitsisoqassaaq maleruagassat malillugit akilerneqartussamik. Initaartinneqartarneq utaqqinarsinnaasarmat, utaqqisoqassappat maleruagassat malillugit utaqqiisaasumik inissinneqarsinnaaneq piareersimaffigisariaqarpoq. Taamaattoqassappallu akileraarnermut maleruagassat malillugit atugaq akileraarutigineqartussalluni.
Atorfik pillugu annertunerusumik paasisaqarusukkuit saaffigisinnaavaat Kommune Kujallermi Atuarfeqarnermut, meeqqeriveqarnermut nutaaliornermullu ingerlatsivimmi suliaqarfimmut pisortaq Magdaline Geraae e-mail mage@kujalleq.gl paasiniaavigineqarsinnaavoq
Qinnuteqaat pillagaasimannginnermut uppernarsaat, ilinniagaqarsimanermut paasissutissat suliffigisimasallu nalunaarsornerat soraarummeersimanermit uppernarsaatit assilineri il.il. PDF-filinngorlugit kommunip nittartagaatigut tunniunneqariissapput kingusinnerpaamik septembarip ulluisa 29-iat 2024 imaluunniit uunga nassiunneqassallutik:
MALUGIUK: Qinnuteqaatit pappilissatigut e-mail-ikkulluunniit tiguneq ajorpagut, inussiarnersumik qinnuteqaatit PDF-fil-inngorlugu nittartagaq aqqutigalugu nassiunniunneqassapput.
”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Kujallermiit atuutsinneqalerpoq. Tamanna 2018-imi ukiortaamiit eqqunneqarpoq. Paasissutissat sukumiinerusut pissarsiariumagaanni Sulisoqarnermut Immikkoortortaq attavigineqarsinnaavoq”
Qinnuteqarnissamut killissarititaasoq: septembarip 29.-at, 2024