Qaqortumi allattoqarfimmi overassistenti
Allaffissornikkut suliassanik ulapaarneq innuttaasunullu attaveqarneq nuannaraagit? Taava immaqa atorfik ilinnut soqutiginarpoq.
Aggustip ulluisa aallaqqaataa 2025 imaluunniit erseqqinnerusumik isumaqatigiissuteqarnikkut allattoqarfimmi overassistentitut atorfik Qaqortumi Sullissivimmut attuumassuteqartussaq inuttalerneqassaaq.
Overassistentitut ulluinnarni qiimasaarfiusumi ulapaartassaatit kiisalu suliffinni innuttaasunik qinikkanillu sullissineq pitsaasoq qitiutinneqassallutik. Atorfik pineqartoq tamakkiisumik suliffiuvoq allaffissornikkullu pisortaq qullersarineqassalluni.
Suliffeqarfimmi sumulluunniit attaveqarsinnaanissat suleqateqarsinnaanissallu pingaaruteqarpoq.
Pisortat ingerlatsivianni sulinermut misilittagaqaruit iluaqutaassaaq.
Allattoqarfimmi suliassat tassaasarput
- Kommunalbestyrelsip ataatsimiititaliallu ataatsimiinnissaasa suliassartaannik piareersaaneq.
- Aningaasaqarnermik aqutsissummi naatsorsuutinut nalunaarsuineq, naligiissaarinerit nuussinerillu.
- Allaffimmi atortussanik, kaffinik/tiinik assigisaannillu aqutsineq nakkutiliinerlu kiisalu pisiortorneq.
- Ataatsimiittarfimmik inniminniineq.
- Aalakoornartulinnik sassaallersinnaanermut akuersissutissanik qinnuteqaatit aqunneqarneri nakkutigineqarnerilu.
- Qinikkat ullormusiaat kiisalu taakku naligiissarneri.
- Pisortanit katititsinissanik piareersaaneq.
Innuttaasunik sullissinermi makku suliassasapput
- Innuttaasunik kiffartuussineq
- Piffissamik inniminniinerit
- Suliassat inuit aqqisa allattorsimaffiannut tunngasut
- Sulianik suliareqqitassanngortitassanik isumaginninneq
- MitID
- Nunaqarfinnik sullissineq
Atorfimmut tunngatillugu pisinnaasat/naatsorsuutigisat
- Naleqquttumik ilinniakkat, allaffimiusut ilinniarsimaneq assigisaaluunniit
- Inussiarnersoq, namminersorsinnaasoq, aamma sungiussiallunilu aaqqissuussinermut piginnaasaqartoq, suliassanut nutaanut paasiniaasinnaasoq aamma tamanik ataatsimut isiginnissinnaanermik attassisinnaasoq, peqqutigalugu immikkoortortaqarfiit, innuttaasut kiisalu suleqatit avataanersut annertuumik attavigineqartartussaammata.
- Kalaallisut qallunaatullu oqallorissuuneq
- Ingerlatsivimmi suliaqarnermik misilittagaqarneq
- Pinerluuteqarsimannginnermut uppernarsaat
- Aalajaatsuuneq, pimoorussineq aamma suliamut, suleqatinut innuttaasunullu qiimasuuneq
- Ingerlatsivimmi ulapaarfiusumi persuarsiornanngitsumilu sulinermik nuannarisaqartutit
Qinnuteqartoq atuagarsornikkut naatsorsuuserinermut ilinniarsimanermi saniatigut atorfimmi suliarineqartussanut uppernarsarneqarsinnaasumik misilittagalik salliutinneqassaaq. Piumasaqaatit taakku naammassisimagukkit immikkoortortami nuannersumi suliamut sunniuteqarluarfigisassani kommunip atorfimmik neqeroorfigisinnaavaatit.
Sulinngiffeqartoqartillugu, napparsimasoqartillugu allatigullu sulinngittoqartillugu immikkoortortami sulisut suliassatigut tamakkiisumik tapertareqatigiittarnissaat pingaartinneqaqaaq.
10.00-miit 14.00-mut ammanerup nalaani Sullissiviimmiittassaatit kiisalu piffissap sinnerani allattoqarfimiittassallutit.
Niuertarfimmiut allaffimmiullu pillugit Naalakkersuisut SIK-rlu isumaqatigiissutaat naapertorlugit akissarsiaqartitsisoqarlunilu atorfimmi atugassaqartitsisoqassaaq.
Ineqarneq: Atorfimmut atatillugu inissaqartitsisoqanngilaq.
Atorfik pillugu paasissutissat sukumiinerusut allaffissornikkut aqutsisoq Ulla Rafaelsen oqarasuaat (+299) 66 46 01-imut -imut sianerluni imlt. e-mailikkut: ulra@kujalleq.gl saaffiginninnikkut pissarsiarineqarsinnaapput.
Qinnuteqaat, pineqaatissinneqarsimannginnermik uppernarsaatitalik, kiisalu ilinniagaqarsimanermut siusinnerusukkullu sulisimanermik paasissutissartalik, ilinniarsimanermut uppernarsaatit nuunnera, allallu pdf-inngorlugit Kommunimut tunniunneqareersimassaaq kingusinnerpaamik juulip ulluisa arferngat 2025
MALUGIUK: Qinnuteqaatit pappilissatigut e-mailikkulluunniit tiguneq ajorpagut, inussiarnersumik qinnuteqaatit PDF-filinngorlugu nittartagaq aqqutigalugu nassiunniunneqassapput.
”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Kujallermiit atuutsinneqarpoq. Tamanna januaarip aallaqqaataani 2018-imi atuutilerpoq. Paasissutissat sukumiinerusut Sulisoqarnermut Immikkoortortaqarfimmut piniarneqarsinnaapput ”
Qinnuteqarnissamut killissarititaasoq: juulip 6.-at, 2025